" KOUTOUBI SHONTHUNGROU
"
...... ..... .... .... .... .... ..... ... ....
.... ......
-Merungkham dangsha
EPISODE- 1
Lhaipang thimiyei rongchan
ah lungshimakko ? Angtu
khirou,ninga hirou
muchangmak hukhatnikhi
heiya khiyeiroume touri
mlumlei ashi ashiyei
kaningya phannanung
hulnarou.Rongchan ri shimpi
shilpipuyei hutthulme
lhaipang thiminung.Tamma
nimak rongchanrou kla
kounak nungkarngai kounak
urbini yenkunglei angtukhi
lipmakni.nungkhat
nungkhatnuiyei chara
rabphabi rongchan kounak
ringlei duini krungei omna
doura tungbi yayei
kaningnara ring kounakkhi
yaolei.
Heiyei lakra malungshi waari
kounak urbini rongchan
lishing lishing loukimmurra
lhaipangrouwei khatri ringlei
angtu rampha rongchan
kounakri urmak
yamaknak,chamak yamak
palthung lungnanung
toubi,chap thothoni klaobi
chalei lhungeirou me
ningchabi karngana
palthungri.Heiyei rilla
Teshamran khatri Parkham
yapuichakhi yaolei.
15 Dec.005
phalbiyei yeengkur
nungwarwai,was hanui
khungei kheen.
Teshamran : (laa sha)
'Angtu lhaini kidourou
Ohoo......
shamran rongchanri Lou
mantheilei.
reidang shomthumni
loukarngeirou,
kantrim rongchan
loushonnarou ohhoooo...
khu-thrung kounak
loushonkhoubi.......
Parkham : (mitkap kathuk)
Nuwiyo kou kouwayo ?
Teshamran : laa shakurame
khamcha.
Parkham : koungammei
heinak making shuk laa
shawo nuwi?
Teshamran : angturi
nuwi,yaukur waari kalengni
ningshingleime..
Parkham : kai nuwicha
yauthuwa.
Teshamran :
khamcha,nungwarrou bei
watdeirou katipriya.
parkham douwa
hoiyanungkhe ai nuwiyei kla
lhangaidui kmu,iplakrou
hotna heiya ai nuwi ya khalbi
iblakchangmak.
Parkham : (bei leibei) nuwi
yo....
Teshamran : kouweiyo
khamcha?
Parkham : (khun nimni)
nuwi,kapuichaya thraini
lungshipimakra kousa?
Teshamran : khamcha,heitou
yunheimakme.angtu
kapuicha Ni Tangla
katmu,Sorwa mashing thi
kya,phaklang put cheemra
leipha aaso kaya shilpipu ni
lunggshinei me.
Parkham : heiya
nuwi,koutoubi anakchang
kanringei loupalkurro ?
Teshamran : halnungri kakhi
ashitou loupalmak me.
Parkham : heitouwanungri
koutoubi ?....
Episode 2
FOURTY YEARS BEFORE
Kheen: Trunwai / Sheichan
Ningshun manma ;
Atung : Manei,manei Parchaan?
Parchaan: Kouweiyo maneicha? ningshun manma waidarou kathukko?
Atung : nimakne maneicha, angtu leipaak kummoi chaa aat rou touya nang charouko tou ngaithirou kame ?
Parchaan : huichim tousuma kummoi umrou touya?
Atung : Yuldakrei Pater kohai Angtewa
Parchaan: chawase heiyanung yuldakei nngaka rabkhi charouleiya.
Atung: heitouwanung manmani yuthukka kei loungakrou.
Parchaan: moi moi chak anri luila me.
KHATLANGRA
Angtewa: Akocha nateinao koutoula,chak-ann, Shimna moran(tul),yui,anpol nung,chak naa,annpal naa,tul cap,sai,churup,waa..watsham ngaine kansherlak.leipaak chak khang touri karbilne ninga hil mi laonamaknung.Manmani thukrouso leipakcha..
Kolhourui: pawa manranglane,thikulchila..watsham kounak leiyanung khi Meirup Upa(kalanga upa) le pao manlunrillouwa.
Angtewa: ngaiya heiyanungri.
Kolhourui: kai Leiwacha bei ra-thilei(tallei) so pawa.
Leiphom(phingrou) : keikhi churlei lhouri koko
kolhourui: um churne, yutyut koura koura heicha kalnei.
Angtewa: yawa yawa Leiwacha nangkhi beiyariso..
Todar : chak chalakka thinga mi waidarou warouwaso.
Leiphom: kai nuwicha laang yauthuwa..chak yurlakka
Todar: nai Tete ne yurlarou
Leipham: pawa hungka chalakkasi.
(chak charou omni)-Tete kou ann no?
Temui: Aichum ne,kaikung shu khatne.Angi koko ai thanga mannei Ai Phangatamcha yaoya chumkura.
Angtewa: hungka Akocha,nai nuwi ngkhi.
Todar(chak chana pangra myungbi) : Naipa khullakacheem nung Tulkhang khat loulakne ngairou ko?kounak watleikou khi.
Angtewa : moi watrou mallanungri Leiwacha walouheilak chak cha dongbei...
Ningshun chak charilbei kummoi chaa aatnareinung warilyauwa.Bamputdei thimi khatsol duini nangaka katlang khatri Laarung kounakkhi waidarou wamarshik. Laarung upa ni laa katyaulei,hilla leipakcha namni chanthungbi hou klumni laa shalei.Nngaka rabni phikham shaa lepbi,shanarei,Yangwarei paar khanara yepbeini Baanrei laklak,hohei kanthumni chaa kat aat lei waiso na langra.Katlang rabni chamchi shinbi lhingkham doudou chaarungya namdumbi kalei waisona langra murrani laa houchouni sabei.
Kolhourui(bei leibei) : leipaakcha katyung karngalou.......
Tarra khatni: nngakarab katkarnga katkarnga..
Parchaan(Atung nungei) : loupu katlanga hori ko?
Atungne: au hori ne Kolhourui touri.
parchaan: lhou ningrou mallei ne.
Atung: au ningneime kummoi umrou laknari.
Heini lhainiri yenkimmura....
HAPTAKHAT LEIBI
Kummoi chaa umni lhaini;
Khu-kantang rei nangaka katlang,upa douwa naimakni Kummoi chaa umna ruilaiyaa karhilbei leilei. Nupuinu rabni phikham sha manshambi chaa pambi nuibi hunglei, nngaka katlang ni loulhungra chaa luura urbei pareng hunglei thani chaadang ra leilei chaaput shimlei .masa duini laarung ni laa shabi Ruilaira chaa umlei.
Nangaka katlang chaa theina lakra:
(Nngaka rabni): (laa sha) manem lhouyang kallalo,molyei reidang heithilei ne hoiyarilo .
(katlang) : molyei reidang kalleine manem louyang karyuilei.me hoiyarilo ...
(nngaka khatni) : loupu ne duilei chathei kalri
Kolhourui: nngaka rabni duilei..
Atungni: um nngakakhi kal yaolei ne
Parchaan: (hutchuni heithing atung ya)
Atung: kouweiyo..
Parchaan: (hou nimne) mine musaroune
Atung: mul leiya he
katlanga khatni: manei rab hungthuwase..hoiha..
Atung(chaa put urbang la): so so..
Parchaan: Manei atung kei chaa put beicha ase..
Kolhourui(khrangni) : chak wathungbang
Parchaan yasi ngakhat thirilbei leiyeinung..
thakrei leibi Atungni ahmm hunglakkalo.
parchaan: (rikrai le lungshi pulbei ne khrangni Atung ya chanthung)
Kolhourui: hilla kat-thithung.
EPISODE-3
lalala..hohoho....(laoyum yum laa sha Kolhourui )
Mekhul: ahmmm hmm..kapui,kaapui..kouwa churro?
kolhourui: eh..kou churmakne..theem bei paangrakne.kourei chawo kapui?
Mekhul: yuldak langra nngaka pang kouka karthanglei ko tou yuthukkame..
Kolhourui: haha(lao)nakari yuldak ra makne..wa -ammalo(omna khangpi).
Mekhul: nimak ne kapui nng anthak koushikhat toulei..knaa rou mallei so.
Kolhourui: kourei he..kna naimakme keiri.
Mekhul: heishirou yaoyum yum leiri...
Kolhourui: haha lao yamakko...(bei leibei)kapui nng kou wari khatcha sanileime..
Mekhul: haiss...kei mulei kna na bi...
Kolhourui: tangme kapui,angi kai chaa umnarei yao sham khyang maibei radha toubi chouchaso..
Mekhul: heiviri Laamal bungrei Salung Modar rei khatchatom puk me..mairungkhi lhangai lhouchur khi karshuk tou yunrilne.
Kolhourui: hei kapui nngni bei rumpilo,nngni pao maringpilo.
Mekhul: heitouwanungri napawa thukrou dawa ni.heiya kapui nei Yaa channak,karshul nak ri toumakno.
Kolhourui: kourei yo..maneiyei pangra myungchangrou malmaklei me.
Mekhul: nashi murilnanung kei shillouwa.katlang upa(katlang rkhang upa) khatri nngaka upa nung tlou ngaibi Atung kou khi murilbi wari sarisi kei..
Kolhourui: moi heitoubi bei shilpillo..baimak mathangchalei kapui.
Mekhul: (lao bi) palui thilya kou wa heishiri pangrou dame..
kei sallouwa kapui..
Kolhouri: au kapui rawai nung murillasi..
Rkhang ka kheen
Kolhourui: kapui atuinung rampha wathukmakka nang lhangai dui yunmaksane Atung nung..nimakkanung Ngaka upa ne wathukyermaknei kousa?keile wari sanimaknei rou ko.
Mekhul: kapui mul yuk ombei ngaklak.lourei Yung kanak nimakkune.keine lhangai ne shunkhou..wathukyeirou.
Kolhourui khatri Mekhul laamal bungra tangla warnara ombei wari shanung ngak.
Kolhourui: lawa so kapui Dingwa hoiyanung chaa lamphangnga Lhou luilarou.
Mekhul: kapui kapui.. heithilak kailang thimi napungni walei
Kolhourui: kapui wari kotou yaurou sa..
Atung(pangra wadara) : manei Mekhul kathukur larako?
Lungkhamakno nngaka upa le murilnei ya.
Mekhul: au omkur beicha lawurra.
Kolhourui: manei nashiri kou aan maiyo?
Atung: keiri Ruidun maine.
Mekhul : Atung kasi laamal lungpak ra ommase alangra tangla khi lhangaidui warlei..
Kolhuirui:( ri bei leibei) Manei parchaan..
Parchaan: kouweiyo manei?
Kolhuirui: Lhouyang keiyei manei neiya bi ahrou ungthutri koungammei nimakme..
Parchaan: yulmakne maryeng thutpilo manei.
Kolhourui: solungei wahei khat khanicha sherthudeise solung marhuini louningpilo.
Katthilak nungthoura(hut katshunmando nungthou lhangra) Taangla sorwa ni yukthulei karungei omna biya.Yani mularou solungei karngeiri.
Parchaan: heiya Tangla sorwa ni louthukmak hoina ngamrou lungtrim keinungeiri yunshunpimaklei me.
Kolhourui: louthukmak hoiyanungkhi mularou solungri katmunakni sorwa ri nungthourei laani.
Parchaan: heiya shamran keiyei puthini dunmaknarou lhouyang solungri mumanlalei..karkaomakni tampilo lungtrim keinungei.
Kolhourui: khalkhoumak lhungshiri nungkhatkhi.heiya,koulangrei yensha marthi touri muthungmak,yekthungmak kouya hungwoirou.solungei kanningna lamsoya yenrabpha.Angtu masari lhouyang pangra karshilni heiya solung keiyei louthukmak hoiyurnei ngamni lhouyang murni yunthutchangmaklei.. lhungshi tou awari ko?.
manei Parchaan(khun nimni) kei neiya malung yaoni lhungshilei me..kouya khalleiyo maneiyei ukningra?solung mardoumakni rulpilo ..
Parchaan: manei lhouyang....reidang keiyei waheiya myekbi lhouyang solung yaukhapimakno.reidang keiri kheen watleihui duini nuwi pawa yei kaning yaomakni kantrim keiyei mantrang maklei hui.
Atung: (lanarei hei ung) maneicha sallakkase thingame.
Kolhourui: (khumnimaknak) ah..au...sallakkase thingurra.
Mang ngaiyase manei..
Parchaan: au mang ngaiyase manei..
Ningshun manma
Kolhourui hing se..koko..kok..
Todar(nuwi) :Akocha,kai lourei chaa marshiknung toulakkalo.chulpungra Yu ne - waa ne luilourouwa ne..
chapulpuk nungkhi rorouwa...
Kolhourui: (lao bei) nuwi chaa marshikmakkhi yarou.marshiknung makrouwane kumturi..haha
Todar: Akocha laomaklo meeri marshik luichila ne.
Kolhourui: kai nuwi cha.. ara wawa kei tlou khatcha yunpisi.
Todar: Douwa malso akocha.
Kolhourui: wariyatoubi..nei mou munimakko..
Todar: (laoyum) tangeiko..akocha hui chimmo,hui cha tounei ne.
Kolhourui: nuwi tapne..pawa nashi lhou tounungei leira heiya toulanungri luila..
Todar: heiya kou louwo?
Kolhourui: mou ngairou charou dawane,Tul-likli changrou.
Todar: heiya me nngakari huweiyo yunmakni..
kolhourui: ohh naimou Parchaan..laamal bungrei salung Modar rei khatchatom kyao nngaka so.
Todar: (harao ni) yara yara heiyanung. nungaira kei nai pawa nung yunbi khrangni nai puwa pipi kou khallnabi lhangai lhaini dinbi Tul-likli changnung tourou wa..nungaira nungaira.
Temui(char):kai nuwi pang yaukurrasane.nungaira nungaira toubi chimrilla hungchangkurra.
Kolhourui solung ra yunnung makni hakrao ai nuwi yei kaning lungyerrou wa khalbi.duini bommai himtammei puipa puwa pipi ne khe yaroune ningchabi..ngaklei kouni lhainirou Mou ngairou(tul-likli) toubi.
EPISODE - 4
Angtewa: naipui?kalakkase katthingame
Todar: langmakhui,mou ngairou charouri bei malemakneri.
Angtewa: napuiyayei tamasa(kanshot) so..
Todar: luila luila
Angtewa: putang ya pitang yari?
Todar: lou-ngaklarou lira.ningshun manma Angacha ne kayunla.
Angtewa: so so heitouwanung...
KHATLANGRANI
Teshor: parchaan ne nng kou touwo?luilaklako?
Parchaan: kouwa luilakrou yo nuwi?
Teshor: eh mi mou ngairou kawarou so?
parchaan: ashh nuwi koutourou wo kei?...
Teshor : um bei malebi louleimak..mi mabangra kallonung.
Parchaan: nuwi kei rikrainalei ne.
Motang: nai pui? keining ya kawa leine.wathukkalo.
Teshor: (khrangni wathuk)..um...ara ara wachangalo
Motang: puwa khi yaolei...
Puwa: um pitangkhi hilla kathung.
Motang: alang ra wa-ommalo.keining ara ara..
Angtewa: waa nung shariyaulei kumturi.
Motang: um lhou churchangrou malmaklei.
Todar: mou Parchaan ri mumaklei.
Teshor: Ate?parchaan nini ya kalei.
(ngakhak leibi)
parchaan phun mandicha ra cha kep urbi wathuk.
Parchaan: nini, cha...marang, cha.
Teshor:puwa yanungkhe
Todar: umm kei mou cha tuilei..
Angtewa: neipui neikhe neitam mei mou nimakrouso...
... ya namma lao..hahaha
parchaan rikraini chim rilla hungchangra.
Puwa: hmm angtu kaiyei bi ahrou kachangri dei koukhi nimak bangei kaiyei chatknavi hilthungni Moulou-chalou nei ngam.Kheen nei hilthungni angtu kapui Motang khatchatom yao parchaan ya kaiyei mou hoiyeise toubi ka awariya.nngaka katlanga yashikhe loumuril leisa heine bommai himtamni yarilbi yakhuwei rongchan ah parkarthilanung loumong ah wayouthutlei.
Angtewa: hoi kai bomai khi koukhi lo mak duine keiyei cha kolhourui khe duini roushin klei katlanga matik cha louhoimakrou.heiyanung keiyei cha yei pam duini kaning ya mubi angtu bi arou kachang ariya.hoi nupuiya bommai yei kaning yunpinarou ka koukhi malungra yanimak leimakrou.
Motang: um puwa khatri keiningei loukhoukur tlou bam rab hei kainugei ri lhaipak lhangai me.heiya Kei Parchaan cha aiyei kaning tlou beicha ngai rise toubi na nammanung yunthungnilei.
Todar: heiyanungri lhoulam ah khrangni chashunda nungei napuiya lhangrei pao hei kanungkhi lhungyerpilo.
Teshor: heitouwase kakhe paohei heisi yukpiyeise..
Angtewa: heitouwanung ka shalnung tourouwa
Motang: um heiriyane no pao heisi phaorillasi.
Angtewa: neipui nei hatri ?
Todar: eh manei ase likli himtam yumtamcha.
Teshor: wa heiya katheimakkhe..
Todar: mungtha mungthamaklei khi.
yongkhraso...
Teshor: leithungkhra na nam.
RAWAI
Temui: (chak yur) nuwi, angtu mou ngairou chari koutoulawo?pao ningninei nabil(khana) yek yek lei yaowarou mi.
Kolhourui: douwa mur chungmak
Todar: kouwa pao tam tammak kai mou hoirouwane.
Temui : ehh chak thungrou mi ran/kher leiroulei...
Kolhourui: chak thungrouri nng leiwari...
Teshor: lhoulam ah khrangni luilaknungei yunrilla..
Kolhourui(chak bei chayau bei kanthou ra)
Temui: umm angtu chak ukthim
khrang yaolei.
RKHANG
Katlang upa: (katlang rkhang) Rkhang arou klei lhouwa rab,ning ningshuk kulka le napawa beini Hing/thing sharou,beini Khwa shatrou,beine Khwa/hing shatkhou theinung..Koungammei yo touri ka yullei Chaangrui Medarshang ai cheem rho manrangroulei.Shon,rei,ruiphat urbi kheen chani thukpinanung muyerchalei.
Nngaka Upa: (nngaka rkhang) Manem dangwi rab,nninga ningshun manma Nngaka beini katlang hing khwa theinara rumpilak,beini cha/yui phlei nara rhumpilo duini yulmakni yaopilo toubi muyerchalei.
NINGSHUN
Mekhul: kapui nungkangai pao leilei so?
Kolhourui: (lao) kou pao o kapui?
Mekhul: iss mumak karsa.yul lei thimi namni yekla ne.
Kolhourui: um kapui hei nng bei rhumpilo
Mekhul: kouya rhumpilo tounei?
Kolhourui: manei parchaan nung tlou khat khanicha yunnileine.
Mekhul: eh Parchaan yui phlei rou kailangra walei..
Manei parchaan?? yui beicha mogeise?
Parchaan: au monglo manei mekhul.
Mekhul: um kapui kolhourui ne neinung tlou beicha yunnilei to
Parchaan: um
Mekhul: kapui yui mongrou ko?
Kolhourui: umk..umm beicha mongeise (rikraini)
(mekhul yau heikanthoura)
Kolhourui: nungaileihui ko manei?
Parchaan: au nungailei tou rou dawa
Kolhourui: umm kai uparab nairei ka
nng muko?
parchaan: umm mune
Kolhourui: kouya khallo manei ukningra?
Parchaan: (mul leibei) kou khalmakne
Kolhourui: heitouwanung yawawa..Uparab ne ngainanung shillaksu.
Parchaan: ah ah(yunthut changmakni)
Kolhourui: um yunni kounak leiyanung khi nuwi nung khatri Atung nungei pao heimanthunlak.
Parchaan: umm manei.
Kolhourui : heitouwanung kei hing yuloureise.
Parchaan: um(mulcha ombei leithung).
EPISODE - 5
Tangla lunkhat leibi(After one month)
Motang: keining wachangalo..
Teshor: amna amna..puwa...
Teshor : Ate,nini ya kalei..
Parchaan: au nuwi...(yui cap ra heibi wathuk )
nini yui...marang yui...
Puwa: angturi angui lhou waidon hei marshik nanung touwase toubi kalei.Napuiya bommai yei kaning yunpilak.yawanungri lhaini tangla kartin nanung touwasi toubi loubam ah lamkrini khounilei.
Motang:lhoulam hei khrangni chashunda nungei duini luilaknanung touri kakhi pam heiya bommai khanimtammei yakril hilthungni Lhaini tangla kartinnasi duini shil-lhangnungei kheen khi khoupibi kartin nasi toubi yunnilei.
Angtewa: katlanga paa khoini kei kaningri SUNNA(April) tanglarou kartin ri pamlei ngamri chingshang nammakhi lhou shellou,lhoulai yauroukhi watleikhui toubi duinarou bommai khanitamkhi putchei malo/manrang nungkhi kheen leiyeirou khallei.
Leidong:(parchaan puwa) heiyanungri yakrilnei hilthungni Sunna tangla yei Khanitam klung hapta LHIMNI (friday) lhainirou hongasi.duini bommai khanitamni angturou yaubi malo/marshik yaupilakka toubi yunnilei.
puwa: heitouwanungri,lhaini tangla mulaneri lhouchur lhoupangnara bommai khanitamni rhumrilbi watsham namma ngairillak duini chingshang maibangra laonamaknung lhaknawasi toubi luikhamna ra puwa keini yunthunglei.
Motang: puwa khanitammei yarilkur hilthungni,maibangrei kartinnurkhou lhoubamhei lhangaini pangthut mani hoiyasu duini Parchaan khatri Kolhourui yasi rongchaan rou shimpi-shilpipuni tatmakni kalhonpi hoiyasu.
Motang: heitouwanungri nanam arou ashi karkhairiyase...
A DAY BEFORE MARRIAGE
Ramkhei lanarei kho/yul kounakrei nngaka katlang,douwa-upa ,tarra tartui luhongnareinung toubi pothut/wathuk yauwa.Bammai khanitammei cheemkhur,teinao,paacha rabni chan-laangni shillei.watsham kounak ngarilbi,khatni khatya rhumrillei.Chak naa,aan na,tul/cha/yui duini chak ann marshiklei.ramkhei kounak lhungnanung toubi ebna neina,hak, hut-ho chauna kounakkhi marshiklei.Yullai yei nngaka katlang rabni ruibi kho-lam/khullam,chingshang karthilna bi kounak marthinglei duini mansham lei.Douwa upa tara tartui napui-naha nammani ninga lhainiya karngeibi leilei.
kolhourui: kapui nng lawarounung?kayul nngaka katlang rab lawurchiya keiyei luhong nung laknanarou.
Mekhul: kapui lhamakne awari yullai nngaka katlang khatyei toubam thukkame
Kolhourui: heiyari heishiya....eh kei lhoukhat malumlei..kai pipi ne lira lepcha kakhoulo toune...kei kakhoureise kapui..
Mekhul: moi moi tiya hanui murillase..
Kolhourui parchaan yaicheem kadabang nung
Kolhourui: (wakhal) kouwei kai pipi yaicheem thimi chungwa karthilla..ngal-ok/umril yaoneiko..
bei kabi katningnarou...
Teshor: ashh anginung atou thukrou toulanung koungammei kanungei yunmakko?tuinung kou thukka chingshang maibangra ka koutou leirouwo...(chapni kanthi yaoni yun)
Motang: mi hatpharou annak si lhouya huni yaukna yo..ate cha koura lei hatrou hatrou..(kanthi thukni ungraocha)
napuinu khatpine: kouwa yaicheem langkurra?
Napuinu khani:(lou khum) ninga luhongrou nngaka mumaklei te..
Kolhourui: cheemra khrangni chanbei yongara
Temui: nuwi! nuwi! (channi hung )
Todar: kouwo Atecha?
Temui: kai mou..kai mou so(yunthut changmak phinga bei)
Todar: kaimou koutou lawo?
Temui: kaimou makara
Todar: ha kaimoure(kanrillakkura)
Temui: nuwi...nuwi..huhu leileiyo kai nuwi kousikhat tolane...(chapni ungpha)
Leiphom : (channi hung) nuwi nuwi...Ate yui yui...
Temui:nuwi, nuwi yo...(yau omhei)
Todar: (nemnem) Ate, koko ri kouranga?
Leiphom:(kanthou) koko ko..kolhourui ai kaa ra hungthi loumak..
Todar: Akham, kapui mekhul yakou leiko wathiya?
Leiphom: au nuwi(khrangni tukkura)
Angtewa: (phingne hungchang) chacha miya mitthimak,kai cheem ma louhoimakne..thirillou dawa...Angacha, leiwacha yari..
Todar : nai paa koulhourui mumakleine?
Angtewa: ha! yai palui rabnung ngaiphalakmato.....
Temui: akhamcha Ngairou chawurra pawa.
Angtewa: leipak kartukrise mutharou angtuwari..(pothutdura)
Leiphom: kapui kai koko muko?
Mekhul: pipi yaicheemra kawurrame lamakhui kalne..
Leiphom: um kei kathireise kapui
Leiphom:(cheemra yenkalenga) nuwi,koko makleine.yai palui rabnung khi ngaipha ya ngaila mumakthil lourullei..
Temui: Nuwi,kai koko koura chawurrarou heiyanung?angtu kalengmakrouko?koura chek/ib leisa angtu masa re?(chapni ngai)
Leiphom : angtu thirillou dawa(hutra cheipak shinloubi thukkura)
Todar: Ate,nai koko kalengroutou kei ningmumaklei.ahnakkei lungthrammak,annak lhouthiya huni yaukna wo.nai koko yei malung ra kounakchang suklarou,chingshang maibangra hikurle chap malnara angturi.Ashinung kouya toupirou kaiyei chak khangnareinung thukkur chingshangrab.koutou rullouwo NAI MOU KOULANGARA NGA ngailanung.Yo mou parchaan nngkhe manileinung anakkei klu louya workhaubi chakurri.kei pelmak kei tek pelmaklei..asinungri kou thukka kei koko khi koureinung chakur toukhi bibal naimakkur, cheemkhur khanitamkhi ngaowurchiya.kounaksi mouni halnung louyunkhoulanung asi hungwoimakkhi kya.(chap thotho ser)
LEIPAKRANI
malungkhakur Tontanga cheemkhur ni Khulpuwa cheem(parchaan ya tukloukur katlanga) Shrim-hal ya thunle,Hok ka thun le,waa ya hatle toulei duini cheem-cham umdik wandik kounakkhi toula.
Tongtanga mou ngaikhouya tukpinei maral khoini Shrim hal khyumtam(3 mithun),hok khyumtam(3 pig),waa khyumtam(3 cock/hen),waitul khang khyumtam(3 ricebeer pot) duni Dar khat(1 gong-6kap) khulpuwa cheem ne chuila.
Motang: tuinung kouwa thukka,cha napuiya khatchatom yaokhi chingshang maibangra kaya yorbi chawurra,keining yanikhi kaya louhoimakrou duini khulpuwa cheem khi chuinei tou maan -chang luichila.
Teshor: Parchaan ni douwa wakhal tou heiriyanung aiyei kaning lhungnanung chakurri. koutourou pui paa khat hoiyurnarou cha yei kaning loumumaknarou kaiyei karal hoiyurrasa.
Motang: heiyanung khi Parchaan ri douwa nimakkura asi hakri loukhalmurou.
Teshor : soso yaukurri yauwura..chak chathirou ko naipa...
Kolhourui:(cha-woini wakhal) Solungra khalkhou,hakaraokhou keiyei hoiyurrame toubi.pelkhou nuwi ya thibi ukningra heiya angturi Ramei lakrei Tangla nak hoiyurrasa.Chapnibeikhi chapchangmak,laonibeikhi laochangmak aya keiyei rongchan nung tammurkhouneiko?.keiyei rongchan ri manei parchaan neinung makatdurla heiya ng ri keiyei solungya mupimakne chawurra.Angturi lhaini thukkei tangla mumaknak,tangla thukkei lhaini chipkurnak hoiyurra rongchan.chaniya manei nei kaningna lamsora,shonniya nungkarngai hakaraoni.muphamanungkhi maneiyei melrung karyui,myekphamanungkhi neiyei marhui khunya keiyei khna ra, ningphamanungkhi maneiyei pao tatmakni..... ningshingeise lhouyang keini maneiya kheenser lhaini sherrou.charouwa lhouyang keiri maneiyei lhungshi ya urbi,pathung makna lamra,lamso naimakna ramhangra.
Keiya pukpi keiyei malungshi nuwi, pawa,neicha keini naiyei kaningya lhungyerchangmakkura.Keiya pukpiri nuwi pawa,char duini kei naorab ya chapyernanung hoiyurrasa.heiya nuwi,karhollei mapokrou ri neicha kei. kalengni nuwi ung hoiyeise.Angturi neicha kei, bi naimak lam ra hokar karrulla.Enu nuwi ni neicha keinungei phor pithungniyano...
Episode-6
kum khyum leibi - 3yrs later.
Makoubung holira:
Khuring : ate, karngase yui mongnira
Teshamran: au nuwi,yui luilalei kei hunglouweise lou matura.
Khuring : au Bonra yukheilak.
kumtu ri lou kalei kouwa lai katpukhranung..
Teshamran yapuicha loura lhoutun bei klei.
( bei leibei... don..dong..nungmei hou myek).
Khuring : vi kardou mallei nungmei houleine koutousa?
Teshamran : matura.kabrilleine?..koulangra..koura tukrousa..
nungmei hou dongmakne kabnarou...
Khuring : hais angtu kalne kabrilloulei rakora/damkora yulne ngairou...Teshamran khe yuiso langra tukkura.
Khuring : angtu kapuicha koutoununga..laili tukkra lei..koutouleisa atecha ya..
Teshamran ; um arou thlungtang/lungtang kalera yulrouwa..
(housao khunnak myek)..
Teshamran : kai nuwi kousa..
(ungrao) Nuwi...nuwi..
Napawa : mulleiya mulleiya kou toumakrou..
Teshamran omkantumbei lei..
Napawa :(knani) keiya bei rumpilo?
Teshamran :(wakhal)napawa ah sukra lei..koutourousa.chikhe chinalei.
pangra wathinarou..hora hi marao thuk kmu..
Teshamran ; koutoununga?..hee thellara
Napawa ; kei shinlakra suri kyao yukloubei shuri murni nungmei lung yukkholthutlak..
napawa ni ha chikmardebi mit chipne loudou..Teshamran ni nemnem kholthutnung lakna..
nungmei lung kholthutbei lou-nam(medicine plant) khumbei Teshamranni lhungpakra suchalbei yemnara doppi.heitoubei Teshamran ai lurei yit Lhingkhang sitbei napawa ai hohei yemnara lompi..
...nungmei houkhe yekmakkura..
Napawa : baimak mathangchalei neiyei sepha rongchaan rou lumchangmarou.Dunpu ni nei doura kwat naimak phor pi hoiniyasu..
Teshamran ; louroulei.ari thimi khatdei toupibam thuk lhoume.kai nuwi keiya holphalarou kei matu ra hungrouwane.
Napawa : um thimi hunungkhe yunpimakno..
Khuring :(ungpha) Ate..Teshamran hunglakkalo..
Teshamran ; (khrangni hung) nuwi nuwi hunga ne.
Khuring ; nng koukhe toumakko?ukning lawarou nung..
Teshamran ; um koukhe chimakne nuwi..
Khuring : chimra khrangni sallakkasi nai pawa wakhal lawarou.
Teshamran :(khumnimaknak)..um nuwi..nuwi lora yuiso ra theemi khat leilei ne.
Khuring ; ha ! monga ko? uidikhao ko?
teshamran ; kalanghut mallei ne nuwi..Hora sukra ne
Khuring : koutoununga heitouwanungre..chimra napawa rabnung hungyunpirou ko?
Teshamran : yunpimak kriyase nuwi, kai loumatu ra kheen bei leiyerrase ho na ngaibangyen..
Khuring ; oh heine ngairou mallei..
teshamran yapuicha napawa hei Lhoumatura yuloula..
khuring ; ningri huichawo ?
Napawa : kohai Angtewa yei chane..
Khuring : minne kousi ungo?
Napawa: Kolhourui ungne.
khuring : koutoubi kai yuiso ra ?..
Teshamran :(tlou thatni) kai nuwi cha tlou ngai.
Kolhourui : angtu kahut nai yulrei nung toubi yongme lamra monga karthangabeiso..
Khuring ; oh mula mula..
ahri kei cha ate Teshamran makunga.
(Teshamran rikraini laoyum yum)
Kolhourui : keiyari angtui napui chani rakolpila.manei Teshamran karthangmanungri kei kou hoirou munimak.baimak mathangchalei.
Khuring ; koko nei heitou yunmak.kai manikhe awariya.lhimnungei ngamrou makatkur naya sepha lhangaini touchangmak.
Kolhourui : um kumhillou naiyakhe rumpi mani hoiyeise nuwi..
Khuring : ate, chimra shalnung touwase kapuicha..
Teshamran ; um nuwi..Manei kolhou chak ri?
kolhourui : yawane manei cha..
Khuring : o kapuicha yei chakyum cha koko nung warkhourase.Nongok/ngangok lu le shingdi shu khi kyao.
Kolhourui ; yawane lhourei chawabei chak masullarou ne napuicha.
Teshamran : manei Kolhou arou workhouweise..chathungniya.
Khuring : koko kaa ninga manmani waidarou karou louleiniya...
Kolhourui : au nuwi leithungrouwa..manei Teshamran yawane.
Kolhourui (wakhal): yapuicha shalkur ya thithungbi..
ningshing -Temui(char)- ako nang lhou chur lhoupangkhi kallei chakkhe beiri changleiso..haha
Todar(nuwi) ; lhou churrabeiri chungchung charou da..chalak akocha chung chalak hehe chak lakkeis..
kolhourui mitra mityui yendakur myekthungmak..
" KOUTOUBI SHONTHUNGROU "
Episode- 7
Kolhourui : Manei ara wawalo theenglim karlera ammase salhim karyuiya marletdase..
Teshamran : au manei kya me
Kolhourui : manei kei neinung tlou khatcha yunnung leilei me ?
Teshamran : kouweiyo manei..solung palmakni shunpilo
Kolhourui : manei shamran neiya karthangni lhainirou yaubi lhouyang kei maneiyatom karngeiyura.lhouyang keiyei solungya mupimakrouko?
Teshamran : haha ...manei lhouyang neiyei kanyerni reidang keiyei solungya karngayermaklei
Khuring : Ate,..Teshamran kanthoulakkalo ?..kapuicha hingdik rou chawase...
Teshamran : (lhaipang myekthungle) au nuwi..kanthouwane.
Wakhalra mangrei lhoumu ya lhaipangnakrim ningshingbei klei..
Khuring : so so..shonshincha heibi Wawa..
Teshamran : au nuwi louchawa..
Yullei chaangrui ni khulhung thung paochil
Yullairei klei douwa upa nanammei bomra laipaak pao chillei..Angtu lhainirou khukhatpi khukhatpanikhi koura kourakhi hungcha wancha toupimaklo toubi muyerlei ngamri angi Makoubung lamsorei hut-thukrilkur hilthungni mongaa(army) rab raamra raahbei/kanshaibei klei yalei.kounakshi karthang wanthang toulanungri hutthi-lathi dakur kya.
Teshamran : Nuwi..lhougaklo?..Angtu raamra cha yaomakroutou myekleiko?
Khuring : au myekleine..kalengrou dawane
Teshamran :(wakhal) umm angtu keiyei mongrei loukamuri ahnungei lhimrouso..
Nuwi,heitoulanung ka lhoura chamarounung ?
Khuring : raamra chamaklo touleineri koutou charouwo..
Teshamran : Nuwi paanung yunbei lepcha kakhou yaleikousa ?
Khuring : nai paane yaroumalmaklei ne.chawanungkhe nai paa chalakso.
Teshamran tlou yunnungei mongma mumakne mul leira..
Angdar cheem maishut-ra/langluwai ra ombei theem Chur
Angdar : naipui Angtu naya koura charou touneiyo? Raamra chamaklo touleine.
Teshamran :(cheem hungdawa) lhoura charouko touneine..
Angdar : angturi chamakka,meekhi hukhe charilmakrou
Khuring : heitoulanung naipa nanganungkhe lep kakhouwalo ?
Angdar : koureiyohe..kei leipaak Lou leilei
Khuring :(pangra wanakbei khun nimni) naipa lhou klu khat leineine..
Angdar : kouwo heiya?
Khuring :(uksani) kai Lhoumatu ra mee khat leithungne
Angdar : ha! Uidikhaoko?
Khuring : um hingdakreiyane..workhoumakroukhe kai thimiyabi.koutouro? Nungmeinekhe sukkurla leimaklotou koutou louhillou.
Angdar : umm heikhe chimma.heitouwanungri bei yukleiriyasu erangkhe nim kngak hoini,Kei kayeise heitoulanung.
Teshamran : pawa ngkhi chak chamakhuirouso?
Angdar : um chak yurlakka..
Khuring : hungka hungka chawaishangkasi..
Khuring(chak chawoini): eh Koko khe ningshun chak chapimakkeirou
Teshamran : kourei chakka charouwo lhou matuura.
Angdar : um sai bei yukyumlak Ate..
Khuring : Chaktham beile phitsu khe yuklumlak..
Teshamran chak bei phitsu beile mutnara yumbei pawanung pithung.wakhalrari aakhi kani heiya ai-paawanung murneri yunchangmak.hanuikhe ani khal- koungammei ainungei lhimrou kei aplung klapiri,halnung kmu khe nimak,bibal knai yei klei thimikhe nimak
Khuring :(ung) Ate..
Teshamran :(ngakni) ..haa hoi..nuwi kouweiyo?
Khuring : chaa bei phouthutlaklo,Lhoura chamakkeinung bei shuwase.
Teshamran :umm nuwi
Khuring : Wangkho ne koura thuwanung..
Angdar : Koko neiyei ho-khe lhangailungmakkhui toubei kai cheemra heishi yukleiya..nei cheemnak khallak..hmmm! keiri lhaipak thi tourouko Cha napawa khatthakhi yaomak nngne kei cha napawa Dara..
Nangaka khatne :(ung) manei kolhourui ara yuwalo Aanpal saise..Tingshangbo/khanachanghei palleine..
Angdar : um..Koko Nangaka rab Aanpal leite..nngkhe yupiyaa..
kolhourui :(rikraini) au paawa..
Nangaka khatne : Teshamran yai Koko ara wa amlo..
Kolhourui : yawane maneirab
Katlang khatni : kapui koukhe rikraimak kayul nangakayei mairi Sai-unnak tha thilso..haha
Nangaka khatni : yawa naikhe heitouri yunrilmakse..
Teshamran yai Koko ri malung keryuilei so..kaiyul Nangaka ngaini omchangmak yaoraleiso..haha(ya Nam klao)
Nangaka khatni : umm aangui yaubi meikhu thuk yaorane..hehe
katlanga khatni : kapui kolhourui, ningari yullai kummei leilei paluikhe yaorou daso
Teshamran : (khamput langra/encho) lamkriyei laa sarou,nuirou katlangari heirine..
Kolhourui : um yaoroune paluirap.
Kummoi lhaini
Teshamran : Koko ara wawalo Heinou holi Tangla warnara ommase.
Kolhourui : au baimakni nungailei manei Shamran nai yul-aa..keiyari thrai yei yenphalet nak thukkura.naiyei yul aa workhoubi chachangrou malmakleine..
Teshamran :(wakhalra) manei nangni keiyei pangra leiyeinung kei koukhi kla maklei..karyomni kei pangra leipiyanung kounak hakaraorou.
(Khun thukni)- kourakhi chapimaklo..
Kolhourui : ha ! Kouweiyo ?
Teshamran :(rikraini mai shikhuplakbi) umm. koukhi nimakne.kaiyulcha lungshina tounei me..
Kolhourui : um heiya keiri chamak yamakne.atuinungri Ho nakhi ngaira,ninga phitniya chanung darouwa.
Teshamran : manei kolhourui neiyei salbangnung neiyei pao beicha manring khoupi yamakrouko? Kumhillou kounakshi lhaipak thini karthengmakkanung neiyei paoringya ningshingni shonthungeise
Kolhourui : koungammei yamakrouwo..
Khalwurkhou solungra khalmakkarou lungshiri,heiya solung keiyei lungshini paalhimna ngamrou Angtu neiyei pangra wa-am awariya.
Teshamran : Reidang keiyei puthini yukmakna ngamni manei neiyei kanyerri baalyaoni kolphab changmaklei..kanre kandangni yengthutpilo.
Kolhourui : umm..ningshinglei Angtu rampha keiyei hoiyurame rongchaan nei toubi.heiya,ramei lakrei tangla changkhurnakni,workhoubi chawurra ningawame luhongrou tou lhaininung.Luhongna lhainirou Keikhi keiyei malungshi nuwi pawa,char,teinao,plui,cheemkhur namya workhoubi chakur.
Teshamran : oh..maneiyei yaukur wariya kalengni ningshingyerbi solungra layerla,..ngakpiniya manei kolhourui.
Nangaka khatni :(kat-ung) Teshamran nashikhe ara yuwalo Nangaka katlang laa sanara
Teshamran : au manei cha yuwa yuwa..
Koko kashikhe yuyaowase..
Kolhourui : umm yukase heitoulanung
Nangaka katlang karhilni omthil lailamra mei hongbei..
Nangaka katlang ngani laa khumril khumril sa
Katlang khatni : Angturi bangei tek kmumak,tek myekthimak..kaiyei yullai arou.
Heiya angturi ningpharouwa..heiri kaiyei malungshina plui Kolhourui ni laa khatcha shapilakso toubi yullei Nangaka katlanga runghut khoini keini shunchalei..
(Ya namma mulcha klei)
Kolhourui : yul arouwei Nangaka khatri katlangaya lamkrine nanammaya mathanglei,kalhonni khrumchalei..naiyei rhumpi,naiyei malungshi karingpihei keiyei rongchaan ni malhumkhoumarou.shimpi dunpuni nai yullai ya phor pi hoiyaso.
Keiri laa sakhi heimak heiya keiyei phalui khatnungei kanyerna khoini khatcha shaweisi.kayei pluini kailhimnungei lhaipangya workhoubi louchawurra,aiyei Minni Moshangphun tou ung.
(Laa sha yau) - Moshangphun na Ai laipak thinarou.Manipur rifle ralshuknarou hiyura.Ukhrul ramra hiyurrame Moshangphun.kayui Nangaka cross loubunlaklo..
(Mayamni hutmai Bing...langailei langailei kolhourui...) To b contd.....
